فكره صغنونه و درج وكرتونه
طبعا كلكم بتقولوا ايه المجنونه دى
بصوا يا قمرات دى فكره صغيره بس هتعجبكم جدااااا ومش هتخليكى تتزنقى خالص فى الاكل لحد اخر الشهر بعملها من فتره والحمد لله عمرى ما حسيت ان فيه حاجه ناقصه فى البيت
هقولكم عليها بس جربى شهر وهتلااقى على طول بيتك ماليان خير وعمرك ما هتحسى انك مزنوقه ولو اى حد يجيلك فجاه هتتصرفى ومش هتحتاجى لاى حاجه
طبعا كلنا اول الشهر بيبقه معانا المصروف بخيره وبنصرف وبنبعزق صح ونيجى اخر الشهر او بمعنى اصح من يوم 15 بنقول بوفر ونمشى الشهر ازاى ومن هنا جاتلى الفكره دى
انا عندى كرتونه بعيده عن ايدى حطاها فى اوضه نوم الولااد وراء الدولااب وكل ما انزل اعمل حسابى انى اشترى اى حاجه زياده باى فلوس كيس ملح علبه صلصه كيس سكر كيس مكرونه كيس سكر باكو شاى وارميها فى الكرتونه دى دا وكدا اى ما انزل واشترى خزين للبيت والحاجات دى اساسيه فى البيت على طول الكرتونه دى ماليانه وبعيد عن ايدى وعن الحاجات الى فى المطبخ باى فلوس حتى لو 2 جنيه
وعندى درج فى الفريزر بسميه درج الطوارىء ودا مش بفتحه غير فى الزنقه بعمل فيه ايه برمى فيه اى حاجه زياده مثلاا بقطع اللحمه على اد العدد وفضل حتين برميهم شويه لحمه معصجه او مفرومه او صدر بانيه او ورك سواء مستوى او نى ولو هعمل اكل جديد تانى يوم واحدفهم فى الدرج وبلااقى بعد فتره الدرج دا فيه حاجات كتير كان ممكن متتكلش تانى يوم لانها بتكون فضلاات لانها زياده لو حتى شويه سجق وبعمل ايه باجى فى الزنقه او اخر الشهر باخد لو شويه مفروم بعصجهم واعمل بيهم مكرونه بولونيز وشويه بطاطس محمره وبتعدى لو شويه سجق برضوا بحمرهم على كام بيصه واليوم بيعدى لو صوبعين كوفته بحمرهم على البيض او بفرفتهم على طبق مكرونه او للفطار الصبح بالبيض وبيكون طعمها روعه صدر بانيه بيتقطع ويتعمل شاورمه حتتين لحمه بيتسلقوا ويتحمرووا ويبقوا جنب الاكل اى حاجه زياده صدقينى ساعات كتير بعمل بيتزا من بواقى الحاجات الى فى الفريزر ومش بتكلفنى غير الدقيق ويوم وبيعدى اما بقه كرتونتى حبيبتى برضوا بتاعه الطوارى يوم مكرونه رز او دقيق واعمل حتى لو بشويه سمنه وشويه عسل بعمل فطير مشلتت وبنقضى اليوم واى حاجه عندك صدقينى لو عملتيها ومتكلتش اول يوم مش هتتاكل تانى يوم غير لما تغيريها بفكره جديده وممكن علشان تكونى لسه واكلااها نفسك بتزهد فيها يعنى هقولكم على مثال كان عندى كسكسى كتير وجم ولاادى اكلوا منه يومين وراء بعض ومكانوش عايزين يبصوا ليه تانى خلااص روحت لفاه فى كيس نايلون وفى الفريزر وبعد فتره خرجته وفكيته وبشويه زبده سخنه وعملت سكر بودره وحطيتهلهم صحه وعافيه واكلوه وعجبهم جدا وافتكرونى لسه جايباه يعنى بجد طالما الحاجه نظيفه وملفوفه كويس هتنفع فى وقت زنقه وخصوصا الوقت الى بيكونوا لسه جايين من المدارس وانتى لسه ملحقتيش تطبخى وكمان الشوربات اوعوا بجد ترمى اى شوربه انا بسيبها تبرد وبجمدها فى الفريزر وفى اى يوم بعمل منها محاشى ملوخيه او اى طبيخ خضار او مكرونه او رقاق وخصوصا هتنفعك جدا لو عايزه تعملى خضار او محشى وفى نفس الوقت هتشوى الفراخ طبعا مش هينفع تخرجى منها شوربه وبرضوا تنفعك فى ايام الزنقه فى اى اكله وهتوفرلك والاكل طالما خضار وحلو وطازه وجنبه شويه رز حلوين كدا وشويه مخلل وصحه وعافيه وتقضى يومك خلى بالك فى ايام الى ربنا ميسرهالك افتكرى ايام الزنقه وديما تعملى حسابك للايام دى علشان مترجعيش تقولى ياريت الى جرى مكان وعلى راى المثل الى بيحسب الحسابات فى الهنا بيبات
ويارب يعجبكم
